Jejak.co-Kappra, lamba’ mola neng e Disa Banuaju, Tang-Batang, Songennep, Madura, Jaba Temor, manabi badha na’-kana’ ngota tor moros, otaba sala settongnga bisaos, na’-kana’ gella’ ekoca’ ecapo’ panyake’ malem.
Dineng tambana, biyasana pas engala’agi konco’na samper, roman (bungkella dame), ban sabadhana konco’na dhaun laenna. Konco’-komco’ gella’ eyobbar, ban kana’ jareya epatoju’ e tengnga taneyan e attassa okossa. Mare jareya, na’-kana’ gapaneka pas terros epandhi’i.
“Ca’na rowa, mon epandhi’i, panyake’na bakal elang, panyake’ badan bagiyan attas ondur noro’ okos, se bagiyan baba gaggar eyanyo’ aeng,” jarna’ Sahnawi (45) dha’ Jejak.co, Rebbu (13/8/2019).
“Oreng lamba’ reya kan awam! Baktona jareya biyasana tengnga malem tempona sake’. Ban se ekoca’ sake’ malem reya, mon na’-kana’ jareya moros ban ngota, essena tabu’ kalowar ka attas ban ka baba. Ca’na oreng sateya, muntaber,” tamba jarna’ Sahnawi.
Laen disa laen tareka. Laen Banuaju laen Bangkal. Manabi neng e Bangkal, bila badha na’-kana’ ecapo’ panyake’ malem, kappra na’-kana’ gapaneka jugan epandhi’in neng e tengnga taneyan. Namong bunten ta’ akadiya kappra budhajana oreng Banuaju.
Neng e Disa Bangkal, Kacamadan Kottha, Kabupaten Sumenep, mon badha na’-kana’ ecapo’ sake’ malem, biyasana na’-kana’ gapaneka jujuk duli epandhi’in sareng oreng seppona neng e tengnga taneyan. Lastare epandhi’in, na’-kana’ gella’ pas egiba buru berka’ sareng oreng seppona ka tengnga taneyan ka’angguy alengka kolare otaba kolaras se ampon eyobbar sambi tong-settongnga dhari settong kantos sapolo. Namong, bila dhapa’ ka sapolo, bunten ta’ ngoca’ sapolo, namong egante’en kalaban oca’ “sabaras”. (don)
